final year-2020

Graduation ka final year start hone se phle,

socha tha ki final project ke baad bheegi aankhon se, 

doston ko cab me bithakar, Alvida kahne se phle,

aakhiri baar iss qadar jina hai,

jaise ab yeh college na milega hamko dobara,

irada bana liya tha ki bahut kuch karna hai iss bar,

phir chahe har shaam naye restaurant me khane jana ho,

college fest ke time, Goa ghoom ke aana ho,

maas bunk karke dhuan udana ho,

chai ki tapri pe jhoom ke jana ho,

raat ke teen baje hostel me pathake jalana ho,

kettle me maggi banakar canteen se chai lana ho,

dost ki girlfriend ka diya huva gift udana ho,

ya phir dairymilk khate khate gana gana ho,

Ajeeb lagta hai na, 

itni jaldi kaise beet gye ye char saal, 

janab yeh waqt hai  gujar jata hai,

chaar saal aur beet jayenge 

lekin ab wo jhalle dost sath nhi honge

jinke sath me sara din sari raat 

hostel ke ek chhote se kamre me

CS khel ke gujar diya karte the.

woh chhota sa kamra jane kitni yaadein sanjo ke rkhe huve hai,

pathar se bana hai na shayad isiliye ro nahi pata hoga.

kamre ki deewaron pe kuch naam khude huve hain, 

unme se kuch name mil kar dekhe gaye bade bade sapno ke hai,

to kuch name dil me baithe apno ke hain.

kuch tasveerein bhi ukeri huvi hai mene apne hathon se,

ek tasveer me to meri badi badi aankhein itne sare doston ke beech me rkhi huvi

uss ek triple schezwan fried rice ki plate ko aise ghoor rhi hai,

jaise mechanical wale bhanwaron se bhari huvi class me koi phool aa gaya ho. 

wahan deewar ke beechon beech

mere doston ne mere name ke aage ek dil banakar ek aur name likh diya,

college me shayad uske alawa sab ko pata tha ki me usse kitna pyaar karta hun.

ya phir shayad usko bhi pata ho 

warna itni khoobsurat bala bhala ab tak single kaise reh skti hai,

shayad meri tarah uski bhi himat nhi huvi hogi karib aake dil ki baat kehne ki,

lekin mere harami doston ne iss baar farewell pe usko propose karne ke liye mujhe convince kar hi liya,

bahar dikhane ke liye bhale hi mene unko baar baar mana kiya ho 

lekin andar hi andar mera dil bhi jhoom rha tha.

chalo aur kuch nhi to chalte chalte sath me ek tasveer hi shi.

uske dil ke raaz bhi to pata chalenge ki usko kya chayie.

zindagi bhar gila to nhi rhega ki kabhi koshish hi nhi ki.

par khair choro ab kya fayada jab farewell hona hi muskil hai,

mana bahut muski hota mere liye ek ghutne pe baith ke uss ko phool dena,

lekin mujhe ekk baar mauka to milna chayie tha na,

mana bahut jyada muskil hota unn jhalle doston ko Alvida kehna

lekin mujhe ekk baar mauka to milna chayie tha na,

Lekin ab ye sab na ho payega,

chalo theek hai me samjhta hun, iss mahamari ke aatank ko,

na jane kitni jaane nigal gyi hai aur na jane kitni aur niglegi,

koi shikayat nhi kar rha me kisi se bas yaad dila rha hun

jab itihaas ke panno pe iske dushparinam likhe jayein 

to meri aankhon me palne wale uss khwab ka name bhi likhna

jo shayad ab zindagi bhar ke liye tanha aur adhura reh jayega.

-Mudit sand